Argentina millisinin əfsanəvi futbolçularından biri olan Anxel Di Mariya, beynəlxalq arenada uzun illər çətinliklərlə qarşılaşıb. Lionel Messinin komanda yoldaşı olan Di Mariya, Argentina ilə bir çox finalda uğursuzluğa düçar olub. 2014-cü il Dünya Çempionatı, 2015 və 2016-cı illərdə Amerika Kuboku finalları onun karyerasında ən böyük xəyal qırıqlıqları kimi qalıb.
Buna baxmayaraq, 2021-ci ildə Braziliyaya qarşı Amerika Kubokunun finalında yeganə qolu vuraraq komandaya qələbə qazandıran Di Mariya, 2022-ci ildə Dünya Çempionatının finalında da qol vuraraq tarixə düşüb. Ancaq son müsahibəsində futbolçunun yaşadığı emosional çətinliklər hələ də davam edir.
Di Mariya Argentina mətbuatına verdiyi müsahibədə psixoloji gərginlikdən hələ də tam xilas olmadığını bildirib:
“Buna görə hələ də dərman qəbul edirəm. Dozanı azaltmışam, indi daha yaxşıyam, amma bu, bir qədər asılılıq yaradır. Bu, (Carlos) Bilardoda da baş vermişdi. Bir çox insanlar bundan əziyyət çəkir, amma mən indi daha yaxşıyam. Bəzi şeylər insanın yaddaşında qalır və həyatını dəyişir.”
O, həmçinin idmanda uğursuz olan komandaların unudulmasından şikayətlənib:
“Finala çıxan, amma qazanamayan komandalar haqqında kim danışır? Heç kim. Yalnız qaliblər xatırlanır. Buna görə də, biz çempion olanda, Amerika Kubokunu qazandıqda həmişə deyirdim ki, bu uğur əvvəlki nəsillərə də aiddir. Onlardan çox şey öyrəndim.”
Di Mariya artıq beynəlxalq karyerasına son qoymaq qərarına gəldiyini açıqlayıb. O, 2024-cü il Amerika Kubokunun onun üçün son turnir olacağını bildirib:
“Artıq 37 yaşım var və nə olacağını bilmirəm. Messi kimi mən də hər oyunu ayrı dəyərləndirirəm. Bədənimin reaksiyasını görmək lazımdır. Son zamanlar əzələ zədələrindən əziyyət çəkirəm, bu da qərarımı təsir edir.”
Benfika klubunda çıxış edən Di Mariya, yüksək səviyyədə oyun göstərməkdə davam edir. O, bu mövsüm 14 qol vurub və 8 məhsuldar ötürmə edib. Lakin o, Argentina millisindəki karyerasını bitirmək qərarında israrlıdır:
“Mən millini istədiyim şəkildə tərk etdim. Amerika Kubokunu qazansaq da, qazanmasaq da, qərarım eyni olacaqdı. Skaloni ilə danışdım və ona ‘Bu, mənim üçün son idi’ dedim.”
Beləliklə, Anxel Di Mariya Argentina futbol tarixində əbədi iz qoyaraq, millidəki karyerasına nöqtə qoymağa hazırlaşır.
